ah! udey cry? big person like you, make uno do so. the knife be for my own protection so make uno shake. ugo fit take your time remove am, just pay attention to me.

abi you know say for this life inside eno be everything be gidigidi. ebi dem tings some. sometimes you for take am slow. that be how mansa come fall for me. the night she come my there make we fok, then i already know say she be shanton ein woman but ebi dem tings some. she tell me say she dey like how how i dey pump am slow.

"as for abraham he does it too fast, it's not sweet like your own."

abraham? that be when i find out say that be shanton ein real name but you never fit call am that.

me then mansa come date lowkey but as she dawg me three months later, i barb. she say she no want do the sneaky link again but i know say ebi sake of shanton come hit money plus ein boys - dem online tings some. the whole area know say that be dema ronning. i know anka i join them but then ano get vim like that. the way mansa dawg me, e pain me small but ebi dem tings some. had i know is at last or however dem dey talk that thing.

the time i dey technical training, some senior really do me rough waa. but as i report to housemaster, he tell me say ebi dem tings some. that be the second time for my life inside wey i shock give authority - the first time go be another story.

i learn some word as i dey that school: extinct. you dey barb am? edey mean something e disappear.

as my old boy die, ein siblings show we true shege. then i figa vultures make extinct for here but ano know say more dey my family inside. one of the family meetings after the funeral really vex me. dem want take over old boy ein business and turn wona house into family house. some elders too bring blade say dem go shave mommie ein hair. herh. e turn fight that day. i even break bottle but dem hold me say make i cool down. dem try tell me say the traditions be dem tings some but i never gree.

but as i tell you, for this life inside eno be everything be gidigidi. ebi dem tings some. sometimes you for take am cool.

you see the way i relax make you komot your sim card from the phone inside so say uno go lose your contacts and tings... make uno reach house then curse me just because i kwashey you o. haha. just take am as dem things some. next year by this time you fit kai this moment then laugh.

what be your name? here deɛ make uno dey pass alone after 8pm o. you see say i chat plus you saa nobody else pass. ebi dem places some.